ياسامعين الصوت
يسألوني
انت شيعي ؟؟ انت سني ؟؟
وين ساكن؟؟
يم الشيخ لو يم ابو النعمان
لو يم ابو الجوادين
وآنه بالحسينيه... بالجامع أدور منهو اليوم طاحوا
طاح أخوي؟...أنذبح خالي ؟...أبن عمي؟
ما أبجي عليهم... أبجي منهم
ياخايبين ضيعتوا الوطن
والوطن غالي أعز من روحي عندي
يسالوني انت شيعي؟ انت سني؟
وآنه للكاظم أبذاك الصوب ازوره
أنامن بالصحن من شمة عطوره
وبكربلا للحسين أتعنه ازوره...
من صغر ظفري وصغر سني
ويسالوني انت شيعي ؟... انت سني؟
آنه بالجوادين بذاك الصوب تباركت وأدفنت أمي
و بشيخ معروف نايم المرحوم ما من يوم وسألني
على امك أنت طالع لو على عمك النام يمّي؟
بالهويه ياخذوني اليوم ويسالوني وين رايح انت سني؟
كلت والله للعباس جدي مِتعنّي أرد أشوفه ....
أسأله العباس سني ؟
كلت متعنّي أشوفن داحي خيبر الكرار أشكيله همّي
أرد أشوفن ويرضى الحسين بكربلا...
وبنفس الوطن ينهدر دمك و دمي؟
آنه ما ادري أصار بيينه .....
آخ وياوسفه الصار بيينه
الله واكبرسووهه بيينه
ياوسفه ونجحت خططهم
ياوسفه اللي طاحوا بالجوامع بالحسينيات اليوم
ذوله أولاد خالي ....أولاد عمّي
ياهالوادم من الصوبين أتفلش وطنّه
يهالوادم وصلت النار بحجرنه وأحتركنه
ياسامعين الصوت الجاي منهم أكثر من اليوم بحزنّه
ياسامعين الصوت كافي
أنت شيعي؟....أنت سني؟
ياخوي الوطن من الصوبين طايح
ياخوي من طائفية الشردتنه وطشّرت دمك ودمي
ياعراقي أصحى تره أتفلش بلدنا ....
ياخويَ احتركنه ما بقى بالوطن غيرالجنايز...
على الصوبين يمّك ويمّي
ياخويَ الاجنبي وج النار بيينه
ياخويَ وفرحان بذبحنه منّا بيينه...
ماله شغله يتفرج علينه...
أمجتف أبيده ويغنّي
ويسألوني أنت شيعي؟... أنت سني؟
ياخويَ ودير بالك
فلشوا الجامع الجنت بي وياك أصلّي
كالوا الشيعي علكها ...
والحسينيه فجّروهه...
وكالوا الفجّرهه سنّي
ياخوي وآنه للحسن والهادي أضمه....
من زمان انام وياه بالصحن من صغر سنّي
آنه افجره وصدّكت والائمه تاج راسي...
بعد ابوي وبعد أمي
وصدّكت تطيني اِيديَّ....
ومن زمان أنت تشيل همّي
ياخوي وصدكت لو نسيت أحنه بثورة العشرين أيد وحده ....
وبيهه أنخبط دمك بدمي
ياخوي شبيك وكافي عاد
العراقي باللبن فتّح
ُأهُم اللي شعلوهه وكالوا....
هذا شيعي.... وهذا سني
اخوك العراقي
الرجاء نشر هذه القصيده لكل العراقيين الاحبة في وطننا العراق الجريح
