انا اصدك يـا بغـداد
شعر وداد الاورفه لي
انا اصدك يا بغداد ارجـــع اوتـرجعيلي
وخلي راسي اعلى رجليج بليل تلوليلــي
واصدك اشم قداحيج وانا ازـوا وتزهيلـي
يا ريت نرجع سوة مثل كـبل تهوسيلــي
بركصة الجوبي يايمـة كل يوم تدبجيلـــي
اشلون انسة المسكوف بابونواس تسكفيلـي
ويا نـبعة الريحـانة اسمــعيج تغنيلــي
اني ا واهل الصوبين انغنيليـج واتغنيلــي
ويمج دجلة الصافي انا اغسلج وتغسليلـي
عجب يرجع ذاك الزمن وشلهج وتشلهينـي
وشم ترابج الطيب اصلي عليه وتباركينــي
حركتي كلبي يا بغــداد الله عليج ديكوليلي
يعني ايصير احلم فد يوم ارجع او ترجعيلـي
من اوصل لبغداد جم اعلوج تضحيلـــي
يروحــون فدوة الــج ادعيلج وتدعيلي
واللة ابجي من فركتج حتى عمتلي اعيونـي
كوليلي وانة بغربتي مـن يكـدر يداوينـي
محــد ايداريني ابد اكو غيرج يداريــني
ولا يعرف قدري بشر انت وحدج تقدرينـي
ولا احد يصلــي علـي غـيرج اكو يصليلي
ارد اموتن انا برضج او بترابج تدفنيـــــني
بترابـج تدفنيني بترابـــج تدفنيــــتني
انا اصــدك يا بغــداد ارجــع وترجعيلي
عمان في 27/3/2007
No comments:
Post a Comment