يللي إسمك على لسان كل اهل الگهاوي
وحديثك يرويه كل قاص وكل راوى
ياالمنصوب على الميز يا بطل زحلاوى
والكعدة وياك تحلا بزلاطة ومشاوى
كل مصّة منّك الف تعادل وتساوى
وتنسّى الواحد شجان بفكره ناوى
وتحلا بيك ام كلثوم وعود مكّاوى
والموشاعر تلگى رصافى لو زهاوى
ياملهم السياب وحب كل بصراوى
خلّلى عصيرك چرك زهدى لوخستاوى
لكن رخصك يموت عليه كل مصلاوى
وشربك السحر كلّه يجرح ويداوى
ومن جوّه راسك المشاكل والبلاوى
يشهد ابو نوّاس والنهضة والعَلاوى
ياحبيب المشخاب والدليمى وراوى
وكلدانى اشورى يزيدى والمنداوى
غدار ما تتأمّن يابطل الزحلاوى
بأول ربع المحترف يرجع يصير هاوى
وبالنص السبع بيهم ينگلب واوى
مكرود تصدر بحقك بيانات وفتاوى
الشيعى يمنعك ويكتب ضدّك شكاوى
والسنّى يحرّمك ويلطشك بالسكتاوى
ويدِفعون بيك لو ما عدهم كراوى
بس العيب البيك ويّه الكل تخاوى
هذا طبعك ودومك مزهى يا غاوى
ويزهى بيك التتن ولفّة السبعاوى
ودومك تضل فخر يابطل الزحلاوى
No comments:
Post a Comment